१ असार, काठमाडौं — कैलालीको गोदावरी नगरपालिका–४ स्थित गाईमारेमा वन अतिक्रमण हटाउने क्रममा टेम्पो भीरबाट खसालिएको घटनाको छानबिन गर्न समिति गठन गरिएको छ।
उद्योग, पर्यटन, वन तथा वातावरण मन्त्रालयले प्रदेश वन निर्देशनालयका निर्देशक डा. हेमराज बिष्टको संयोजकत्वमा छानबिन समिति गठन गरेको हो।
मन्त्रालयका सचिव दीर्घनारायण कोइरालाका अनुसार मन्त्रीस्तरीय निर्णयबाट गठित समितिलाई घटनाको सत्यतथ्य छानबिन गरी सात दिनभित्र प्रतिवेदन पेश गर्ने जिम्मेवारी दिइएको छ।
समितिमा जिल्ला प्रशासन कार्यालय कैलालीका सहायक प्रमुख जिल्ला अधिकारी किरण जोशी, डिभिजन वन कार्यालय पहलमानपुरका वरिष्ठ डिभिजनल वन अधिकृत जनक पाध्या, यातायात व्यवस्था कार्यालय कैलालीका मेकानिकल इन्जिनियर धोजराज जोशी तथा वन तथा वातावरण मन्त्रालयका कानुन अधिकृत विजयराज ओझा सदस्य रहेका छन्।
गत जेठ २९ गते वन अतिक्रमण हटाउने क्रममा वन कर्मचारीले टेम्पोलाई भीरबाट खसालेको भिडियो सार्वजनिक भएपछि उक्त घटनाले व्यापक चर्चा र विवाद उत्पन्न गरेको थियो। त्यसपछि प्रदेश सरकारले घटनाको छानबिन गर्न समिति गठन गरेको हो।
सचिव कोइरालाले मन्त्रालयले घटनालाई गम्भीर रूपमा लिएको बताउँदै निष्पक्ष छानबिनपछि दोषी देखिएकामाथि कारबाही गरिने जानकारी दिए।
यस घटनामा सोधपुछका लागि प्रहरीले १२ जना वन कर्मचारीलाई नियन्त्रणमा लिएको छ।
