११ असोज, काठमाडौं — पूर्वप्रधानन्यायाधीश चोलेन्द्रशमशेर जबरालाई परिवारको जिम्मा लगाइएको छ।
शनिबार मध्यराति महाराजगञ्जस्थित निवासबाट पक्राउ परेका जबरालाई केहीबेरअघि परिवारको जिम्मा लगाइएको अपराध अनुसन्धान कार्यालयका एसपी रामेश्वर कार्कीले जानकारी दिए।
यसअघि अपराध अनुसन्धान कार्यालयका एसएसपी सन्तोष खड्काले जबरालाई ‘सुरक्षित ठाउँ’मा पठाइएको बताएका थिए। तर उनले ‘सुरक्षित ठाउँ’ कहाँ हो भन्नेबारे भने खुलाएका थिएनन्।
गएराति अपराध अनुसन्धान कार्यालयको टोलीले महाराजगञ्जस्थित निवासबाट जबरालाई पक्राउ गरेको थियो।
जबरालाई भेट्न अपराध अनुसन्धान कार्यालय पुगेको राष्ट्रिय मानव अधिकार आयोगको टोलीलाई समेत प्रहरीले भेट्न दिएको थिएन। गेटमा करिब ४५ मिनेट कुरेपछि पनि भेट्न नपाएपछि आयोगको टोली फर्किएको थियो।
सरकारले जबरालाई पक्राउ गर्नुपर्नाको कारण भने सार्वजनिक गरेको छैन।
एसएसपी खड्काले ‘सुरक्षा थ्रेट’ भएकाले जबरालाई रातारात कार्यालयमा ल्याएर राख्नुपरेको बताएका छन्।
गएराति अपराध अनुसन्धान कार्यालय टेकुको टोली निवास पुगेपछि जबराले आफ्ना भाइ प्रभुशमशेरलाई फोन गरेर प्रहरी आएको जानकारी गराएका थिए। प्रभुशमशेरले पनि आज बिहान कुराकानी गर्दै ‘जेनजीहरूबाट थ्रेट छ भन्दै प्रहरीले दाइलाई पक्राउ गरेर लगेका’ बताएका छन्।
यद्यपि, कानुनका जानकारहरूले जबरालाई पक्राउ गर्न प्रहरीले अपनाएको शैलीमाथि प्रश्न उठाएका छन्।a
