१७ साउन, काठमाडौं — अमेरिकी राष्ट्रपति डोनाल्ड ट्रम्पले इरानमाथि गर्ने तयारी गरिएको ठूलो सैन्य हमला तत्कालका लागि स्थगित गरिएको घोषणा गरेका छन्। इरान र मध्यपूर्वका अन्य देशहरूको आग्रह तथा दुवै पक्षबीच सम्झौताको प्रारम्भिक ढाँचामा सहमति बनेपछि हमला रोक्ने निर्णय गरिएको ट्रम्पले बताएका हुन्।
आफ्नो सामाजिक सञ्जाल ट्रुथ सोसल मार्फत ट्रम्पले अमेरिका दोस्रो विश्वयुद्धपछिकै ठूलो सैन्य शक्तिसहित इरानमाथि आक्रमण गर्न पूर्ण रूपमा तयार रहेको उल्लेख गर्दै कूटनीतिक सहमतिलाई प्राथमिकता दिँदै हमला स्थगित गरिएको बताएका छन्।
ट्रम्पका अनुसार इरान र मध्यपूर्वका अन्य देशहरूले सम्भावित आक्रमण रोक्न आग्रह गरेका थिए। उनले सम्झौताको प्रारम्भिक ढाँचामा होर्मुज स्ट्रेट तत्काल र पूर्ण रूपमा खोल्ने तथा इरानको आणविक खतरा अन्त्य गर्ने विषय समावेश रहेको दाबी गरेका छन्।
उनले छिट्टै अन्तिम सम्झौता हुने अपेक्षासहित सैन्य हमला रद्द गरिएको उल्लेख गर्दै यस निर्णयमा इजरायल पनि अमेरिकासँगै रहेको बताएका छन्।
अन्तर्राष्ट्रिय सञ्चारमाध्यमहरूका अनुसार साउदी अरबका क्राउन प्रिन्स मोहम्मद बिन सलमानले ट्रम्पसँग टेलिफोनमार्फत वार्ता गर्दै सम्भावित ठूलो सैन्य हमला रोक्न र संयम अपनाउन विशेष आग्रह गरेका थिए।
