२८ वैशाख, काठमाडौं — राष्ट्रिय परीक्षा बोर्डले माध्यमिक शिक्षा परीक्षा (एसईई) को नतिजा सार्वजनिक गर्ने तयारी अन्तर्गत प्राविधिक परीक्षण सुरु गरेको छ । परीक्षण सफल भएमा आज साँझसम्म नतिजा प्रकाशित गर्न सकिने बोर्डले जनाएको छ ।
राष्ट्रिय परीक्षा बोर्डका सदस्यसचिव जंगबहादुर अर्यालका अनुसार अहिले प्राविधिक परीक्षण र आवश्यक छलफल भइरहेको छ । कुनै समस्या नआए आजै साँझ नतिजा सार्वजनिक हुन सक्छ, अन्यथा भोलिसम्ममा प्रकाशित गरिने तयारी रहेको उनले बताए ।
उनले सानो प्राविधिक समस्या आएमा नतिजा सार्वजनिक प्रक्रिया केही समयका लागि रोक्नुपर्ने अवस्था आउन सक्ने पनि उल्लेख गरे ।
यस वर्षको एसईई परीक्षा गत चैत १९ देखि २९ गतेसम्म सञ्चालन गरिएको थियो । परीक्षामा कुल ५ लाख १२ हजार ४२१ जना विद्यार्थीले आवेदन दिएका थिए ।
त्यसमध्ये नियमिततर्फ ४ लाख ४१ हजार ५६६ जना र ग्रेड वृद्धितर्फ ७० हजार ८५५ जना विद्यार्थी सहभागी भएका थिए । परीक्षा बोर्डका अनुसार परीक्षार्थीमध्ये २ लाख ५७ हजार ६१३ छात्रा, २ लाख ५४ हजार ८०१ छात्र र अन्य ७ जना रहेका छन् ।
