१० जेठ, काठमाडौं — पाकिस्तानको क्वेटास्थित चमन गेट नजिक रेलवे ट्र्याकमा भएको विस्फोटमा परी २० जनाको मृत्यु भएको छ भने ७० भन्दा बढी व्यक्ति घाइते भएका छन् ।
आइतबार भएको उक्त विस्फोटपछि रेलका तीन वटा डिब्बा पटरीबाट बाहिरिएका थिए भने दुई वटा डिब्बा पल्टिएका थिए ।
प्रत्यक्षदर्शीहरूका अनुसार विस्फोट निकै शक्तिशाली थियो । विस्फोटका कारण रेलवे ट्र्याक नजिक पार्क गरिएका धेरै सवारीसाधनमा क्षति पुगेको छ भने आसपासका घरहरूमा पनि असर परेको बताइएको छ ।
घटनापछि सुरक्षाका लागि सेना र प्रहरी परिचालन गरिएको छ । तर अहिलेसम्म अधिकारीहरूले विस्फोटको कारण वा हताहतको विस्तृत विवरणबारे कुनै आधिकारिक जानकारी सार्वजनिक गरेका छैनन् ।
रेलमन्त्री मुहम्मद हनिफ अब्बासीले घटनाको कडा शब्दमा निन्दा गरेका छन् ।
रेलवे प्रवक्तामार्फत जारी विज्ञप्तिमा उनले क्वेटा क्यान्टबाट आइरहेको शटल ट्रेन चमन गेट नजिक विस्फोटमा परेको बताएका छन् ।
उनका अनुसार विस्फोटका कारण इन्जिनसहित तीन वटा डिब्बा पटरीबाट बाहिरिएका थिए भने दुई वटा डिब्बा पल्टिएका थिए ।
