१७ जेठ, काठमाडौं — ठगी तथा सम्पत्ति शुद्धीकरण मुद्दामा फरार रहेकी टिकटकमार्फत चर्चित तुल्सा अधिकारीलाई थाइल्यान्डबाट पक्राउ गरी नेपाल ल्याइएको छ। हाल उनलाई जिल्ला प्रहरी परिसर ललितपुरको हिरासतमा राखिएको प्रहरीले जनाएको छ।
ललितपुर प्रहरीका अनुसार इन्टरपोलमार्फत रेड कर्नर नोटिस जारी भएपछि अधिकारी थाइल्यान्डमा पक्राउ परेकी हुन्। पछिल्लो समय उनी चीनमा बस्दै आएकी थिइन् भने त्यहाँबाट थाइल्यान्ड पुगेपछि पक्राउ गरिएको बताइएको छ।
प्रहरीले उनलाई सोमबार जिल्ला अदालत ललितपुरमा उपस्थित गराउने तयारी गरेको छ।
अधिकारीविरुद्ध ६ करोड ५२ लाख २९ हजार रुपैयाँभन्दा बढी ठगी तथा सम्पत्ति शुद्धीकरणसम्बन्धी मुद्दा दायर भएको थियो। अनुसन्धानका क्रममा ठूलो रकमको कारोबार फेला परेपछि सम्पत्ति शुद्धीकरणतर्फ पनि अनुसन्धान विस्तार गरिएको थियो।
उनीविरुद्ध गत साउनमै प्रहरी वृत्त सातदोबाटोमा ठगी तथा आपराधिक विश्वासघातसम्बन्धी उजुरी परेको थियो। सातदोबाटोस्थित ‘हाम्रो अटोमोबाइल्स’का सञ्चालक कुमार चिमोरियाले जाहेरी दिएपछि अनुसन्धान सुरु भएको थियो। त्यसक्रममा अधिकारी फरार भएपछि इन्टरपोलमार्फत रेड नोटिस जारी गरिएको थियो।
