२० वैशाख, काठमाडौं — नारायणगढ–मुग्लिन सडकखण्डमा वर्षाका कारण पहिरो खस्दा यातायातमा असर परेको छ।
तुइन खोला र पानीधार क्षेत्र नजिकै ढुङ्गासहितको पहिरो खसेपछि सडक आंशिक रूपमा अवरुद्ध भएको हो।
बिहान करिब ५:४५ बजे पहिरो खसेपछि अहिले उक्त सडकमा एकतर्फी रूपमा मात्रै सवारी साधन सञ्चालन भइरहेको इलाका प्रहरी कार्यालय मुग्लिनका प्रहरी निरीक्षक प्रतीक सिंहले जानकारी दिएका छन्।
उनका अनुसार पहिरो हटाउनका लागि भरतपुरस्थित डिभिजन सडक कार्यालयबाट डोजर बोलाइएको छ। पहिरो खसेको स्थान मुग्लिनबाट नारायणगढतर्फ करिब पाँच किलोमिटर टाढा पर्छ।
पानीधार क्षेत्रमा भने सडकमा खसेका ढुङ्गा हटाइसकिएको र त्यहाँ अवस्था सामान्य बन्दै गएको प्रहरीले जनाएको छ।
