११ असार, काठमाडौं — विश्व फुटबल महासंघ (फिफा)ले अखिल नेपाल फुटबल संघ (एन्फा)लाई तत्काल प्रभावबाट निलम्बन गरेको छ।
फिफाले बुधबार एन्फाका महासचिव किरण राईलाई इमेलमार्फत पत्र पठाएर निलम्बनबारे जानकारी गराएको हो।
फिफाले निलम्बनको निर्णयसँगै त्यसका कारणहरू पनि उल्लेख गरेको छ। पत्रमा एन्फाको मामिलामा तेस्रो पक्षको अनुचित हस्तक्षेप भएको र सदस्य संघका रूपमा पूरा गर्नुपर्ने दायित्वको गम्भीर उल्लंघन भएको निष्कर्ष निकालिएको उल्लेख छ।
फिफाका अनुसार यस्ता परिस्थितिहरू फिफा विधानको धारा १४ को उपधारा १(आई) र ३ तथा धारा १६(१) विपरीत भएकाले फिफा काउन्सिल ब्युरोले जुन २४, २०२६ मा एन्फालाई तत्काल प्रभावबाट निलम्बन गर्ने निर्णय गरेको हो।
फिफाले निलम्बन फुकुवाका लागि केही सर्त पनि अघि सारेको छ।
त्यसअनुसार राष्ट्रिय खेलकुद परिषदले २५ मार्च २०२६ मा गरेको निर्णय बिना कुनै सर्त पूर्ण रूपमा फिर्ता लिनुपर्ने र हालको एन्फा कार्यसमितिलाई पुनर्बहाली गर्नुपर्ने उल्लेख गरिएको छ।
राष्ट्रिय खेलकुद परिषदले २५ मार्चमा एन्फालाई तीन महिनाका लागि निलम्बन गर्ने निर्णय गरेको थियो।
यस्तै, एन्फाले आफ्नो विधान र नियमावलीअनुसार सुरु भइसकेको निर्वाचन प्रक्रिया यथाशीघ्र सम्पन्न गर्न पाउनुपर्ने शर्त पनि फिफाले राखेको छ।
फिफाको निलम्बनसँगै एन्फाले अर्को सूचना नआएसम्म फिफा सदस्यका रूपमा प्राप्त सबै अधिकार गुमाउनेछ।
यसको प्रभावस्वरूप एन्फाको प्रतिनिधि टोली तथा नेपाली क्लब टोलीहरूले अन्तर्राष्ट्रिय प्रतियोगितामा सहभागिता जनाउन पाउने छैनन्।
