१३ साउन, काठमाडौं — नेपालमा पाटेबाघको संख्या बढेर ४२९ पुगेको छ। सन् २०८२ (वि.सं.) मा गरिएको राष्ट्रिय गणनाअनुसार बाघको संख्या अघिल्लो गणनाको तुलनामा ३५५ बाट बढेर ४२९ पुगेको हो।
अन्तर्राष्ट्रिय बाघ दिवसका अवसरमा मंगलबार आयोजित कार्यक्रममा बाघ गणनाको नतिजा सार्वजनिक गरिएको हो।
गणनाअनुसार पछिल्लो चार वर्षमा देशभर ७४ वटा बाघ थपिएका छन्। हाल चितवन राष्ट्रिय निकुञ्ज र आसपासका क्षेत्रमा १४५, बर्दिया राष्ट्रिय निकुञ्जमा ११२, पर्सा राष्ट्रिय निकुञ्जमा ७१, बाँके राष्ट्रिय निकुञ्जमा ५१ तथा शुक्लाफाँटा राष्ट्रिय निकुञ्ज र आसपासका क्षेत्रमा ५० वटा बाघ रहेका छन्।
यसअघि २०७८ सालको गणनामा चितवनमा १२८, बर्दियामा १२५, पर्सामा ४१, शुक्लाफाँटामा ३६ र बाँकेमा २५ वटा बाघ दर्ता भएका थिए।
यसपटकको गणनामा चितवनमा १७, बाँकेमा २६, पर्सामा ३० र शुक्लाफाँटामा १४ वटा बाघ थपिएका छन्। तर बर्दिया राष्ट्रिय निकुञ्जमा भने बाघको संख्या १३ वटाले घटेको देखिएको छ।
नेपालमा २०७४ सालको गणनामा २३५ वटा बाघ रहेका थिए। त्यसपछि २०७८ सालसम्म बाघको संख्या १२० ले बढेर ३५५ पुगेको थियो। तर पछिल्लो गणनाले बाघको संख्या बढे पनि वृद्धिदर भने घटेको देखाएको छ।
अघिल्लो गणनामा बाघको वृद्धिदर करिब ५१ प्रतिशत रहेको थियो भने यसपटक त्यो घटेर २१ प्रतिशतमा सीमित भएको छ।
राष्ट्रिय निकुञ्ज तथा वन्यजन्तु संरक्षण विभागले अत्याधुनिक क्यामरा ट्र्यापिङ प्रविधिको प्रयोग गरेर बाघको गणना गर्दै आएको छ।
