२३ पुस, काठमाडौं — नेकपा एमालेका अध्यक्ष तथा पूर्वप्रधानमन्त्री केपी शर्मा ओलीले भत्काउने कामबाट मात्रै देश नबन्ने बताएका छन् । नेपाल राष्ट्रिय भूतपूर्व सैनिक तथा प्रहरी संगठनको ३५औँ स्थापना दिवसका अवसरमा आयोजित कार्यक्रममा बोल्दै उनले यस्तो धारणा व्यक्त गरेका हुन् ।
हेटौंडामा सरकारले घर भत्काएको घटनाप्रति आपत्ति जनाउँदै ओलीले वर्तमान सरकारलाई भत्काउने काममै केन्द्रित भएको आरोप लगाए । उनका अनुसार सरकारले निर्वाचन गराउने र त्यसको वातावरण बनाउनेतर्फ ध्यान दिनुपर्नेमा घर भत्काउने कार्य गरिरहेको छ ।
‘यो सरकारले के गर्यो ? हेटौंडामा घर भत्काउनु नै यसको काम हो ? चुनाव गराउनु पर्दैन ? चुनावको वातावरण बनाउनु पर्दैन ? हेटौंडामा घर भत्कायो, आधा भत्कायो, आधा बाँकी छ,’ ओलीले भने, ‘भत्काउने बानी परिसकेको छ । भत्काउनेको निर्देशनमा जे पनि भत्काउन थालेको छ । सरकार भत्काएको, लोकतन्त्र भत्काएको, संविधान भत्काएको, हेटौंडामा भत्काएको, सुकुम्बासी बस्ती भत्काएको, यो सबै भत्काउने काम हो ।’
ओलीले देश निर्माणका लागि सही सोच र विवेक भएको नेतृत्व आवश्यक रहेको पनि उल्लेख गरे । ‘भत्काएर मात्र देश बन्दैन । देश बनाउनुपर्छ । त्यसका लागि दिमाग ठिक ठाउँमा भएका मानिस चाहिन्छन् । उन्माद र नशामा देश बन्न सक्दैन,’ उनले भने ।
