१३ वैशाख, काठमाडौं — उपत्यकाका विभिन्न अव्यवस्थित बस्ती हटाएपछि सरकारले भूमिहीन र सुकुमवासीहरूको पहिचान प्रक्रिया सुरु गरेको छ।
शनिबार बिहानदेखि नदी किनारमा रहेका सुकुमवासी बस्ती खाली गराइएको छ। त्यसपछि त्रिपुरेश्वरस्थित दशरथ रंगशालामा विशेष डेस्क स्थापना गरी वास्तविक सुकुमवासी को हुन् भनेर विवरण संकलन र स्क्रिनिङ भइरहेको छ।
यस क्रममा रंगशालामा आएका सुकुमवासीहरूलाई स्वास्थ्य सेवा पनि उपलब्ध गराइएको छ। उनीहरूको शारीरिक तथा मानसिक अवस्था बुझ्न स्वास्थ्यकर्मीहरूको टोली खटाइएको हो।
प्रधानमन्त्री तथा मन्त्रिपरिषद् कार्यालयका अनुसार काठमाडौं महानगरपालिकाले स्वास्थ्य परीक्षणका लागि टोली परिचालन गरेको छ। हालसम्म कम रक्तचाप भएका ६ जना (४ पुरुष र २ महिला), ढाड तथा जोर्नी दुखाइ भएका २ पुरुष, टाउको दुखाइ भएका २४ जना (१८ पुरुष र ६ महिला), २ जना गर्भवती महिला, चोटपटक लागेका १ जना र अन्य विभिन्न समस्या भएका १२ जनालाई सेवा दिइएको छ।
यससँगै मनोसामाजिक परामर्श सेवा पनि प्रदान गरिएको छ। बहुविवाहको समस्या भएका, अभिभावकविहीन महिला, विद्यालय उमेरका बालबालिका तथा रोजगारीमा रहेका अभिभावकहरूले आफ्ना मानसिक चिन्ताबारे परामर्श लिएका छन्।
स्वास्थ्य विभागका अनुसार धेरैजसो व्यक्तिमा पारिवारिक जिम्मेवारी, रोजगारीको अनिश्चितता र बालबालिकाको पढाइ कसरी अघि बढाउने भन्ने चिन्ताले मानसिक तनाव बढेको देखिएको छ।
