४ जेठ, काठमाडौं — हाल नेपालमा पश्चिमी वायुका साथै स्थानीय वायुको प्रभाव कायम रहेको छ ।
मौसम पूर्वानुमान महाशाखाका अनुसार यसकै प्रभावका कारण अहिले कोशी, बागमती र गण्डकी प्रदेशका केही स्थानमा मेघगर्जन र चट्याङसहित हल्कादेखि मध्यम वर्षा भइरहेको छ ।
आज कोशी प्रदेशका साथै बागमती र गण्डकी प्रदेशका हिमाली तथा पहाडी क्षेत्रमा सामान्यतया बदली रहने सम्भावना रहेको छ । यस्तै कर्णाली प्रदेशको हिमाली क्षेत्र र मधेश प्रदेशमा आंशिक बदली हुन सक्ने अनुमान गरिएको छ । अन्य हिमाली, पहाडी र तराई क्षेत्रको मौसम भने मुख्य रूपमा सफा रहनेछ ।
महाशाखाका अनुसार आगामी समयमा कोशी प्रदेशका केही स्थान तथा बागमती र गण्डकी प्रदेशका हिमाली र पहाडी क्षेत्रका एक–दुई स्थानमा मेघगर्जन र चट्याङसहित हल्का वर्षा हुन सक्ने सम्भावना छ । साथै केही हिमाली क्षेत्रमा हल्का हिमपातको सम्भावना पनि रहेको छ ।
