७ जेठ, काठमाडौं — प्रतिनिधि सभाका स्वतन्त्र सांसद महावीर पुनले बाँदर आतंकको समस्या समाधान गर्न अनुसन्धान आवश्यक रहेको बताएका छन् ।
यसका लागि ५ देखि ७ करोड रुपैयाँसम्म बजेट छुट्याउनुपर्ने उनको भनाइ छ ।
हाल विभिन्न सांसदहरूले बाँदर आतंक बढेको भन्दै सरकारसँग समाधानको माग गर्दै आएका छन् । एमाले सांसद राजेन्द्र राईले त बाँदर नियन्त्रणका लागि एक साताको अल्टिमेटमसमेत दिएका थिए ।
यसै विषयलाई लक्षित गर्दै महावीर पुनले संसदमा आवाज उठाएर मात्र बाँदर समस्या समाधान नहुने बताएका छन् ।
उनले भने, “बाँदर आतंक कम गर्न अनुसन्धान गर्नैपर्छ, संसदमा कराएर मात्र केही हुँदैन । यहाँ धेरै सांसदहरू कराइरहेको देखियो ।”
उनले बाँदर नियन्त्रणका लागि प्रविधि विकास गर्न सजिलो नभएको पनि बताए ।
“रकेट बनाउने प्रविधि त छ, त्यो सजिलो हुन सक्छ । तर बाँदरलाई कसरी हटाउने भन्ने विषयमा मैले संसारभर खोजेको छु, अहिलेसम्म प्रभावकारी उपाय भेटिएको छैन । त्यसका लागि ५/७ करोड बजेट अनुसन्धानमा खर्च गर्नुपर्छ,” उनले भने ।
पुनले हाल सरकारले बाँदर समस्या समाधानका लागि अनुसन्धान टोली गठन गर्ने तयारी गरिरहेको जानकारी आफूले पाएको पनि बताए ।
उनले भने, “सरकारले एउटा अनुसन्धान टोली बनाउने तयारी गरिरहेको सुनेको छु । त्यसमा मलाई पनि राख्न आग्रह गरेको छु । बाँदर आतंक कसरी कम गर्न सकिन्छ भनेर अनुसन्धान गरेर उपाय खोज्नुपर्छ । संसदमा कराएर बाँदर भाग्दैन । बाँदर निकै बुद्धिमान जनावर हो । अहिले सम्म वैज्ञानिकहरूले पनि यसको स्थायी समाधान निकाल्न सकेका छैनन् । एउटा उपायले मात्रै समस्या समाधान हुँदैन ।”
