२९ पुस, काठमाडौं – राष्ट्रपति रामचन्द्र पौडेलले सोमबार चार वटा अध्यादेश जारी गरेका छन्। सरकारले सिफारिस गरेका अध्यादेशहरूमध्ये चारलाई प्रमाणीकरण गरी कार्यान्वयनमा ल्याइएको हो।
जारी अध्यादेशहरूमा सुशासन प्रवर्धन तथा सार्वजनिक सेवा प्रवाह सम्बन्धी केही नेपाल ऐनलाई संशोधन गर्ने अध्यादेश, आर्थिक कार्यविधि तथा वित्तीय उत्तरदायित्व (पहिलो संशोधन) अध्यादेश, निजीकरण (पहिलो संशोधन) अध्यादेश, र आर्थिक तथा व्यावसायिक वातावरण सुधार तथा लगानी अभिवृद्धि सम्बन्धी केही नेपाल ऐनलाई संशोधन गर्ने अध्यादेश समावेश छन्।
राष्ट्रपति कार्यालयका प्रवक्ता शैलजा रेग्मी भट्टराईका अनुसार यी अध्यादेशहरू नेपाल संविधानको धारा ११४ को उपधारा (१) बमोजिम जारी गरिएको हो।
तर, राष्ट्रपति पौडेलले भूमि सम्बन्धी केही नेपाल ऐनलाई संशोधन गर्न बनेको अध्यादेश भने रोकिदिएका छन्। उक्त अध्यादेशलाई पुस २६ गते बसेको मन्त्रिपरिषद् बैठकले प्रमाणीकरणका लागि सिफारिस गरेको थियो।
