२४ वैशाख, काठमाडौं — पूर्वराष्ट्रपति डा. रामवरण यादवसहित केही पूर्वविशिष्ट व्यक्तिहरूले विदेशमा उपचार गराउँदा राज्यकोषबाट गैरकानुनी रूपमा खर्च लिएको आरोपसहित सर्वोच्च अदालतमा रिट दायर गरिएको छ।
सरोज न्यौपानेले बिहीबार दायर गरेको रिटमा पूर्वराष्ट्रपति रामवरण यादव, पूर्वप्रधानमन्त्री केपी शर्मा ओली र झलनाथ खनाल तथा पूर्वपरराष्ट्रमन्त्री सुजाता कोइरालालाई विपक्षी बनाइएको छ।
रिटमा विदेश उपचार खर्च राज्यले व्यहोर्ने स्पष्ट कानुनी व्यवस्था नभएको अवस्थामा मन्त्रिपरिषद्को निर्णयमार्फत उपचार खर्च उपलब्ध गराइएको उल्लेख गरिएको छ। सर्वोच्च अदालतका प्रवक्ता अर्जुनप्रसाद कोइरालाका अनुसार उक्त रिटमाथिको सुनुवाइ शुक्रबारका लागि तय गरिएको छ।
यसअघि पनि पूर्वपदाधिकारीहरूले नेपालमै उपचार सम्भव हुँदाहुँदै विदेशमा उपचार गराउने र त्यसको खर्च सरकारले व्यहोर्ने अभ्यास हुँदै आएको बताइएको छ।
२०७५ सालमा जनस्वास्थ्य ऐन लागू भएपछि यस्तो व्यवस्था रोक्ने प्रयास गरिएको थियो। तर अन्य कार्यविधिको आधारमा विशिष्ट पदाधिकारीहरूले विदेशमा उपचार गराउँदै आएको उल्लेख गरिएको छ।
