२६ चैत, काठमाडौं — निरन्तर वर्षाका कारण बुटवल–नारायणगढ सडकखण्डमा यातायात सेवा अवरुद्ध भएको छ। पूर्व–पश्चिम राजमार्ग अन्तर्गत नवलपरासी (बर्दघाट सुस्तापूर्व) जिल्लाको विनयी त्रिवेणी गाउँपालिका–२ स्थित दाउन्ने क्षेत्रमा सडक हिलो र अत्यधिक चिप्लो बनेपछि आवतजावत पूर्ण रूपमा ठप्प भएको हो।
दाउन्ने क्षेत्रको घिउखोला र विश्वकर्मा मन्दिर आसपास वर्षाका कारण सडक बिग्रिएर सवारीसाधन फसेपछि यातायात सञ्चालन रोकिएको जिल्ला प्रहरी कार्यालय नवलपरासी (बर्दघाट सुस्तापूर्व) का प्रहरी उपरीक्षक युवराज खड्काले जानकारी दिएका छन्।
बुधबार दिउँसोदेखि लगातार परेको पानीका कारण सडकको अवस्था झन् बिग्रिएको छ, जसले गर्दा सवारीसाधन चिप्लिने र जाम हुने समस्या बढेको छ। उनका अनुसार, लगातार सिमसिम पानी परिरहेकाले दाउन्ने उकालोमा सवारीसाधन सञ्चालन गर्न कठिन भइरहेको छ र हिलोका कारण धेरै सवारी फसेका छन्। अहिले मालवाहक सवारीसाधनलाई अरुणखोला क्षेत्रमा रोकिएको छ।
सडकको अवस्था सुधार गर्न दाउन्ने खण्डमा ग्राभेल हाल्ने काम भइरहेको नारायणगढ–बुटवल सडक आयोजनाले जनाएको छ। तर, यस सडक विस्तार आयोजना अन्तर्गत दाउन्ने क्षेत्रमा निर्माण कार्य सम्पन्न नभएकाले सामान्य वर्षामा पनि यस्तो समस्या दोहोरिने गरेको छ।
