२६ चैत, काठमाडौं — पूर्वप्रधानमन्त्री तथा नेकपा एमालेका अध्यक्ष केपी शर्मा ओली आज रिहा हुने भएका छन्। प्रहरी स्रोतका अनुसार उनलाई जिम्मा जमानीमा छाड्ने प्रक्रिया अघि बढाइएको छ।
सर्वोच्च अदालतको आदेशअनुसार सरकारी वकिलको कार्यालयबाट जिम्मा जमानीमा रिहा गर्ने सम्बन्धी कागजात प्राप्त भइसकेपछि आवश्यक प्रक्रिया अगाडि बढाइएको हो। काठमाडौं प्रहरी परिसरका एसएसपी रमेश थापाले ओलीलाई रिहा गर्ने तयारी भइरहेको जानकारी दिएका छन्।
जेनजी आन्दोलनमा दमन गरेको आरोपमा प्रहरीले उनलाई चैत १४ गते गुन्डुस्थित निवासबाट पक्राउ गरेको थियो। स्वास्थ्य अवस्था जटिल भएपछि उनी हाल त्रिवि शिक्षण अस्पतालमा उपचाररत थिए।
यसैबीच, ओलीकी पत्नी राधिका तथा लेखककी पत्नी यशोदाले आफ्ना पतिलाई गैरकानुनी रूपमा हिरासतमा राखिएको भन्दै सर्वोच्च अदालतमा बन्दी प्रत्यक्षीकरणको निवेदन दिएका थिए।
सर्वोच्च अदालतले चैत २३ गते साँझ ओली र तत्कालीन गृहमन्त्री रमेश लेखकसम्बन्धी अनुसन्धान २६ चैतभित्र सक्न आदेश दिएको थियो। साथै, तोकिएको समयभित्र अनुसन्धान पूरा नभए शर्तसहित रिहा गर्न निर्देशन दिएको थियो। यद्यपि, अदालतले उनीहरूको हिरासतलाई कानुनसम्मत ठहर गर्दै बन्दी प्रत्यक्षीकरणको आदेश जारी गर्न अस्वीकार गरेको थियो।
