४ जेठ, काठमाडौं — नेकपा एमालेको केन्द्रीय सचिवालय बैठक भक्तपुरको गुण्डुस्थित अध्यक्ष केपी ओलीको निवासमा सुरु भएको छ ।
फागुन २१ मा भएको निर्वाचनपछि अध्यक्ष ओलीको उपस्थितिमा पहिलोपटक औपचारिक रूपमा बस्न लागेको यो बैठकमा नेताहरूको कार्यविभाजन मुख्य एजेन्डा रहने बताइएको छ । साथै नेताहरूको वरीयता निर्धारण र चुनावी समीक्षाका विषय पनि छलफलमा आउन सक्ने नेताहरूले बताएका छन् ।
तर बैठक सुरु हुनुअघि सदस्यहरूलाई छलफलका एजेन्डाबारे औपचारिक जानकारी दिइएको छैन । एक सचिवालय सदस्यले एजेन्डाबारे बैठकमै थाहा हुने र कार्यविभाजनको विषयमा छलफल हुने सुनिएको बताएका छन् ।
एमालेले गत पुसमा ११औँ राष्ट्रिय महाधिवेशन सम्पन्न गरे पनि हालसम्म नेताहरूको कार्यविभाजन गरेको छैन । स्थायी कमिटी, पोलिटब्युरो तथा अन्य पार्टी समिति र विभागहरू पनि गठन हुन बाँकी छन् ।
एमाले सचिव पदमा रहेका अर्यालका अनुसार अध्यक्षको स्वास्थ्य अवस्थाका कारण सोमबारको बैठकमा मुख्य रूपमा कार्यविभाजन सम्बन्धी विषयमा छलफल भएर निर्णय हुन सक्ने सम्भावना छ ।
निर्वाचनपछि अध्यक्ष केपी ओली केही समय शोकमा परेका थिए । त्यसपछि उनी पक्राउ परेका र पछि रिहा भएपछि पित्तथैलीको शल्यक्रियाका लागि अस्पतालमा बस्नुपरेको कारण पार्टी बैठक बस्न ढिला भएको नेताहरूले बताएका छन् ।
यता एमाले नेता झपटबहादुर रावलले भने तत्काल केन्द्रीय कमिटी बैठक बोलाउन माग गरेका छन् ।
उनका अनुसार २०८२ फागुन २१ मा भएको आम निर्वाचन सम्पन्न भएको करिब अढाइ महिना बितिसक्दा पनि पार्टीको हारको औपचारिक समीक्षा हुन नसक्नु र केन्द्रीय कमिटी बैठक नबस्नुले पार्टीभित्र मात्र होइन, नेता–कार्यकर्ता तथा शुभेच्छुकहरूमा पनि निराशा र चिन्ता बढाएको छ ।
रावलले इतिहासकै कमजोर चुनावी परिणामपछि पार्टीभित्र मौनता छाएको उल्लेख गर्दै सचिवालय बैठकमा छलफल गर्नुपर्ने चार विषय पनि सार्वजनिक गरेका छन् ।
उनले चुनावी हारको गम्भीर समीक्षा, पार्टीको नीति र नेतृत्वमा पुनर्गठन, नेतृत्वको जवाफदेहिता तथा नैतिक जिम्मेवारी र तत्काल केन्द्रीय कमिटी बैठक घोषणा गर्नुपर्ने माग गरेका छन् ।
