१७ जेठ, काठमाडौं — अमेरिकी राष्ट्रपति डोनाल्ड ट्रम्पले इरानसँग युद्ध अन्त्यका लागि तयार भइरहेको सम्भावित सम्झौताका केही महत्वपूर्ण बुँदामा संशोधन गर्न आग्रह गरेका छन्।
ह्वाइट हाउसको सिचुएसन रूममा शुक्रबार अमेरिकी वार्ता टोलीसँग भएको दुई घण्टाको छलफलपछि ट्रम्पले इरानको आणविक कार्यक्रम, उच्च प्रशोधित युरेनियमको व्यवस्थापन र हर्मुज जलडमरूमध्यसम्बन्धी विषयमा थप स्पष्टता खोज्न निर्देशन दिएको बताइएको छ।
अमेरिकी सञ्चारमाध्यम एक्सियसका अनुसार ट्रम्पले इरानले भविष्यमा कहिल्यै आणविक हतियार विकास नगर्ने, करिब ४०० किलो उच्च प्रशोधित युरेनियम हस्तान्तरण गर्ने तथा हर्मुज जलडमरूमध्यमा जहाजहरूको निर्बाध आवागमन सुनिश्चित गर्ने विषयलाई सम्झौतामा अझ स्पष्ट रूपमा समावेश गर्न चाहेका छन्।
हालको प्रारम्भिक समझदारीपत्रमा इरानले आणविक हतियार नबनाउने प्रतिबद्धता जनाएको भए पनि अन्य संवेदनशील विषयमा विस्तृत व्यवस्था छैन। मस्यौदाअनुसार इरानको आणविक कार्यक्रम र अमेरिकाले लगाएका प्रतिबन्धबारे ६० दिनभित्र थप विस्तृत वार्ता गर्ने सहमति प्रस्ताव गरिएको छ।
तर ट्रम्पले विशेषगरी इरानसँग रहेको समृद्ध युरेनियमको व्यवस्थापन, त्यसको हस्तान्तरण प्रक्रिया र समयसीमाबारे थप स्पष्ट व्यवस्था हुनुपर्ने धारणा राखेका छन्। साथै, हर्मुज जलडमरूमध्य पुनः पूर्ण रूपमा सञ्चालन गर्ने विषयमा पनि सम्झौताका शब्दावली संशोधन गर्न चाहेको जनाइएको छ।
अमेरिकी अधिकारीहरूका अनुसार वार्ताको केन्द्रबिन्दु अहिले इरानको आणविक गतिविधिमाथि दीर्घकालीन नियन्त्रण र क्षेत्रीय समुद्री मार्गको सुरक्षालाई सुनिश्चित गर्ने दिशामा केन्द्रित छ।
