२३ चैत, काठमाडौं — अमेरिकी राष्ट्रपति डोनाल्ड ट्रम्पले एक संवेदनशील सैन्य घटनाका कारण शुक्रबार रात निकै तनावपूर्ण अवस्थामा बिताए। उनी ह्वाइट हाउसको ओभल अफिस र वरपर निरन्तर आवतजावत गर्दै घटनाबारे अपडेट लिइरहेका थिए।
त्यस दिन इरानमा अमेरिकी F-15E लडाकू विमान दुर्घटनाग्रस्त भएको थियो, जसमा रहेका दुई चालक दलका सदस्य पनि इरानी भूमिमा खसेका थिए। अमेरिकी इतिहासमा झन्डै दुई दशकपछि यस्तो घटना भएको हो। दुईमध्ये एक जनालाई तत्कालै उद्धार गरिएको थियो भने अर्का कर्नेल दर्जाका अधिकृत सम्पर्कविहीन भएका थिए।
उक्त सैनिकलाई खोज्न इरानले व्यापक खोजी अभियान थालेको थियो। सरकारी सञ्चारमाध्यममार्फत उनलाई पक्राउ गर्न आह्वान गर्दै पुरस्कार घोषणा गरिएको थियो, जसले गर्दा बेपत्ता सैनिकको जोखिम अझ बढेको थियो।
उद्धारका लागि अमेरिकाले तुरुन्तै ब्ल्याकहक हेलिकप्टर पठाएको थियो, तर तीमध्ये एक हेलिकप्टर पनि इरानी आक्रमणमा परेर क्षति पुगेपछि कुवेतमा अवतरण गर्नुपरेको थियो।
त्यसपछि शनिबार ठूलो सैन्य शक्ति प्रयोग गर्दै खोज तथा उद्धार अभियान सञ्चालन गरिएको थियो। मध्यराततिर ट्रम्पले आफ्नो सामाजिक सञ्जालमार्फत “हामीले उनलाई फेला पार्यौं” भन्दै उद्धार सफल भएको घोषणा गरे।
घटनाबारे अमेरिकी सञ्चारमाध्यमहरूले विस्तृत विवरण सार्वजनिक गरेका छन्। रिपोर्टअनुसार, ती घाइते सैनिकले दुश्मनको भूमिमा करिब दुई दिनसम्म ड्रोन र हेलिकप्टरबाट बच्दै पहाडको खोँचमा लुकेर समय बिताएका थिए। उनीसँग एउटा पेस्तोल र सीमित सञ्चार उपकरण मात्रै थियो।
उनले वासिङ्टनमा सन्देश पठाउने प्रयास गरेका थिए, तर सुरुवातमा त्यसलाई इरानी जाल हुन सक्ने भन्दै पूर्ण विश्वास गरिएको थिएन। पछि भने उनी जीवित रहेको पुष्टि भएको थियो।
यसपछि अमेरिकी नेतृत्वले जुनसुकै अवस्थामा पनि सैनिकलाई सुरक्षित फर्काउने निर्णय गर्दै ठूलो स्तरको उद्धार अपरेसन सुरु गर्यो। करिब १०० विशेष फौज, विभिन्न लडाकू विमान र हेलिकप्टर परिचालन गरिएको थियो भने CIAले निरन्तर खुफिया सहयोग प्रदान गरेको थियो।
उद्धारका क्रममा इरानको ध्यान अन्यत्र मोड्न भ्रामक सूचना समेत प्रयोग गरिएको थियो। त्यसपछि बमवर्षक विमान र ड्रोनमार्फत सुरक्षात्मक घेरा तयार गरी विशेष कमाण्डो टोलीले पहाडको खोँचबाट ती सैनिकलाई सुरक्षित रूपमा उद्धार गर्यो।
उक्त अपरेसनमा इजरायलले पनि खुफिया तथा हवाई सहयोग गरेको बताइएको छ।
उद्धार सफल भएपछि ट्रम्पले अमेरिकी सेनाको क्षमता र शक्ति पुनः प्रमाणित भएको दाबी गरेका छन्।
