६ वैशाख, काठमाडौं — सत्तारूढ राष्ट्रिय स्वतन्त्र पार्टी (रास्वपा) ले पहिलो पटक सार्वजनिक रूपमा विज्ञ र योजनाहरू आह्वान गर्ने तयारी गरेको छ।
पार्टीका सहप्रवक्ता विपिनकुमार आचार्यका अनुसार आइतबार बस्ने सचिवालय बैठकले यस सम्बन्धी प्रारूप र कार्यविधि तय गर्नेछ।
सरकारले आगामी जेठ १५ गते बजेट प्रस्तुत गर्ने तयारी गरिरहेको छ। त्यसअघि नीति तथा कार्यक्रम सार्वजनिक गरिनेछ। सोही प्रक्रियालाई ध्यानमा राख्दै रास्वपाले बजेट अघि नै विज्ञ तथा योजनाहरू आह्वान गर्ने योजना बनाएको हो।
हालसम्म यस प्रकारले खुला रूपमा विज्ञ तथा योजनाहरू माग गर्ने अभ्यास नभएको उल्लेख गर्दै रास्वपाले नयाँ अभ्यास सुरु गर्न लागेको जनाएको छ। पार्टीको योजनाअनुसार पूर्वाधार, सूचना प्रविधि, स्वास्थ्य, उद्यमशीलता र उत्पादनलगायत विभिन्न क्षेत्रमा व्यक्ति वा संस्थाले आफ्ना योजना प्रस्तुत गर्न सक्नेछन्।
देश विकासमा व्यक्तिको सोच, योजना र दृष्टिकोणलाई समेत समेट्ने उद्देश्यले यस्तो अभ्यास सुरु गर्न लागिएको रास्वपाले जनाएको छ।
