२६ जेठ, काठमाडौं — प्रधानमन्त्री बालेन्द्र शाहले प्रतिनिधिसभा सदस्य सुधन गुरुङलाई गृहमन्त्रीमा नियुक्त गर्नका लागि राष्ट्रपति रामचन्द्र पौडेलसमक्ष सिफारिस गरेका छन्।
गुरुङले आजै दिउँसो ३ बजे राष्ट्रपतिबाट पद तथा गोपनीयताको शपथ लिने तयारी रहेको जनाइएको छ।
यसअघि गुरुङ चैत १३ गते गृहमन्त्री नियुक्त भएका थिए। तर, सम्पत्ति विवरणसम्बन्धी विषयमा प्रश्न उठेपछि उनले पदबाट राजीनामा दिएका थिए।
उनीसँग सम्बन्धित सार्वजनिक सरोकारका विषयमा अध्ययन तथा छानबिन गर्न सरकारले समिति गठन गरेको थियो। अच्युतप्रसाद भण्डारीको अध्यक्षतामा गठित समितिले गत शुक्रबार प्रधानमन्त्री शाहलाई आफ्नो प्रतिवेदन बुझाएको थियो।
सोमबार बसेको मन्त्रिपरिषद् बैठकले उक्त प्रतिवेदन ग्रहण गरेको छ। त्यसपछि गुरुङलाई पुनः गृहमन्त्रीमा नियुक्तिका लागि सिफारिस गरिएको हो।
यसैगरी, प्रधानमन्त्री शाहले प्रतिनिधिसभा सदस्य महावीर पुनलाई विज्ञान, प्रविधि तथा नवप्रवर्तन मन्त्रीमा नियुक्त गर्न पनि राष्ट्रपतिसमक्ष सिफारिस गरेका छन्।
गुरुङ र पुन दुवैले आजै राष्ट्रपति पौडेलबाट पद तथा गोपनीयताको शपथ लिने कार्यक्रम तय भएको छ।
मन्त्रिपरिषद्को पछिल्लो निर्णयसँगै सरकारले गृह मन्त्रालय र विज्ञान, प्रविधि तथा नवप्रवर्तन मन्त्रालयको नेतृत्वमा नयाँ नियुक्ति प्रक्रिया अघि बढाएको हो।
