३० असार, काठमाडौं — नेकपा एमालेले प्रधानमन्त्री बालेन शाह र राष्ट्रिय स्वतन्त्र पार्टी (रास्वपा) का सभापति रवि लामिछाने प्रतिनिधिसभा बैठकमा प्रवेश गर्ने क्रममा नियमावली उल्लंघन भएको भन्दै सभामुखसँग रुलिङको माग गरेको छ।
प्रतिनिधिसभा बैठकमा एमाले सांसद ऐन महरले प्रतिनिधिसभा नियमावलीको नियम २० को खण्ड (छ) उल्लंघन भएको दाबी गरे।
उनका अनुसार उक्त व्यवस्थामा सभामुखको आसन र बोलिरहेका सदस्यको बीचबाट हिँड्न नपाइने उल्लेख छ।
महरले राप्रपाकी सांसद खुश्बु ओलीले आफ्नो धारणा राखिरहेका बेला प्रधानमन्त्री बालेन शाह र रास्वपा सभापति रवि लामिछाने सोही स्थानबाट हिँडेर प्रवेश गरेको भन्दै नियम उल्लंघन भएको बताए।
यस विषयमा सभामुखको ध्यानाकर्षण गराउँदै उनले आवश्यक रुलिङ गर्न पनि माग गरेका छन्।
प्रधानमन्त्री शाह र सभापति लामिछाने प्रतिनिधिसभा बैठकमा प्रवेश गर्दा राप्रपाकी सांसद खुश्बु ओली बोलिरहेकी थिइन्।
