११ साउन, काठमाडौं — नेपालमा विद्युत्को कुल ऊर्जा माग ७३ हजार ६२९ मेगावाट प्रतिघण्टा पुगेको छ। नेपाल विद्युत् प्राधिकरणका अनुसार हाल भारतबाट कुनै पनि विद्युत् आयात गरिएको छैन।
प्राधिकरणले अहिले २२ हजार १०२ मेगावाट प्रतिघण्टा विद्युत् निर्यात गरिरहेको जनाएको छ।
प्राधिकरणको प्रणालीमा निजी ऊर्जा उत्पादकहरूले ४७ हजार ५६३ मेगावाट प्रतिघण्टा विद्युत् आपूर्ति गरेका छन्। त्यस्तै, प्राधिकरणका सहायक कम्पनीबाट १७ हजार १०८ मेगावाट प्रतिघण्टा र प्राधिकरणका आफ्नै आयोजनाबाट आठ हजार ९५९ मेगावाट प्रतिघण्टा बराबर विद्युत् उपलब्ध भएको छ।
प्राधिकरणका अनुसार राष्ट्रिय विद्युत् माग ५१ हजार ५२७ मेगावाट प्रतिघण्टा रहेको छ। साँझको ‘पिक आवर’ अर्थात् उच्च खपत हुने समयमा अधिकतम माग तीन हजार २४८ मेगावाट पुगेको छ।
हाल देशभर वर्षाका कारण विद्युत् आपूर्तिमा कुनै अवरोध नरहेको प्राधिकरणले जनाएको छ। साथै, कुनै स्थानमा समस्या देखिए तत्काल मर्मत गर्न आवश्यक प्राविधिक जनशक्ति तयारी अवस्थामा राखिएको पनि प्राधिकरणले जानकारी दिएको छ।
प्राधिकरणका अनुसार सातवटै प्रदेश कार्यालय तथा काठमाडौंमा मर्मत टोली परिचालनका लागि तयारी अवस्थामा छन्।
