१३ असोज, काठमाडौं — काठमाडौं उपत्यका अपराध अनुसन्धान कार्यालयका प्रमुख एसएसपी सन्तोष खड्काले राष्ट्रिय मानव अधिकार आयोगमा पुगेर बयान दिएका छन्।
आइतबार अनुगमनका लागि पुगेका आयोगका पदाधिकारीलाई कार्यालयमा प्रवेश गर्न नदिइएको घटनाबारे एसएसपी खड्काले आयोगमा पुगेर बयान दिएका हुन्। आयोगले उनीसँग करिब एक घण्टा सोधपुछ गरेको थियो।
खड्कालाई सोधपुछका लागि उपस्थित गराइदिन आयोगले सोमबार प्रहरी प्रधान कार्यालयलाई पत्र पठाएको थियो।
आयोगका सहप्रवक्ता श्यामबाबु काफ्लेले खड्का बयान दिएर फर्किसकेको जानकारी दिए। उनले भने, ‘उहाँ बयान दिएर फर्किसक्नुभएको छ। छानबिनको प्रक्रियामा रहेकाले के भन्नुभयो भन्ने जानकारी भएन।’ उनका अनुसार घटनाका विषयमा अन्य कसलाई बोलाउने भन्ने निर्णय भने भइसकेको छैन।
यसैबीच, आइतबार बिहान करिब ३ बजे काठमाडौं उपत्यका अपराध अनुसन्धान कार्यालयका डीएसपी योगराज खतिवडाको टोली पूर्वप्रधान न्यायाधीश चोलेन्द्र शमशेर राणाको बाँसबारीस्थित निवास पुगेको थियो।
प्रहरीको टोलीले राणालाई नियन्त्रणमा लिएर कार्यालयमा ल्याएको थियो। राणालाई सुरक्षा थ्रेट रहेको भन्दै कार्यालयमा ल्याइएको प्रहरीको भनाइ छ।
तर, राणालाई कसबाट र कस्तो प्रकारको सुरक्षा थ्रेट थियो भन्नेबारे प्रहरीले र सरकारले अहिलेसम्म खुलाएका छैनन्।
