२७ कात्तिक, काठमाडौं — संयुक्त अरब इमिरेट्स (यूएई) को फुजैराहमा भएको ठूलो सवारी दुर्घटनामा १४ जनाको मृत्यु भएको छ भने ३० जना घाइते भएका छन्।
यूएईको आन्तरिक मन्त्रालयका अनुसार फुजैराहको प्रवेशद्वारनजिक बिहीबार मध्यरातअघि एउटा ट्रक अनियन्त्रित भएपछि २३ वटा सवारीसाधन एकआपसमा ठोक्किएका थिए।
ढिलो गतिमा अघि बढिरहेका सवारीसाधनको भीडमा अनियन्त्रित ट्रक ठोक्किँदा दुर्घटना भएको मन्त्रालयले जनाएको छ। दुर्घटनामा पाँचवटा ट्रकसहित कुल २३ वटा सवारीसाधन संलग्न थिए।
ठक्करपछि एउटा ट्रक पल्टिएर आगलागी भएको थियो। आगो अन्य सवारीसाधनमा समेत फैलिँदा ठूलो मानवीय क्षति भएको मन्त्रालयले जनाएको छ।
फुजैराह प्रहरीले दुर्घटनामा घाइते भएका ३० जनालाई उपचारका लागि अस्पताल पुर्याएको जनाएको छ। घाइतेमध्ये आधालाई उपचारपछि अस्पतालबाट डिस्चार्ज गरिएको छ भने बाँकीको उपचार जारी छ।
दुर्घटनामा मृत्यु भएकाहरूको पहिचानका लागि डीएनए परीक्षण भइरहेको प्रहरीले जनाएको छ। मृतकमध्ये केही यूएईका नागरिक रहेको पुष्टि भएको छ।
यूएईस्थित भारतीय वाणिज्य दूतावासले पनि आफ्ना नागरिकको दुर्घटनामा मृत्यु भएको जनाएको छ। दूतावासले मृतकका परिवारसँग सम्पर्क गरी स्थानीय अधिकारीहरूसँग समन्वय गर्दै आवश्यक सहयोग गरिरहेको बताएको छ।
अधिकारीहरूका अनुसार दुर्घटनामा घाइते हुनेहरू यूएई, ओमान, भारत, ब्राजिल, पाकिस्तान, जोर्डन र इजिप्टका नागरिक रहेका छन्।
दुर्घटनालगत्तै प्रहरी, एम्बुलेन्स र नागरिक सुरक्षा टोली घटनास्थल पुगेका थिए। टोलीले आगो नियन्त्रणमा लिनुका साथै घाइतेहरूको उद्धार गरी अस्पताल पुर्याएको थियो।
हाल घटनास्थललाई सुरक्षित बनाउने तथा दुर्घटनाको कारणबारे थप अनुसन्धान गर्ने काम जारी रहेको अधिकारीहरूले जनाएका छन्।



