१५ असोज, काठमाडौं — पछिल्लो दुई महिनादेखि नेपालले लगातार प्राकृतिक विपद्को सामना गरिरहेको भए पनि पर्यटक आगमनमा भने सुधार देखिएको छ।
नेपाल पर्यटन बोर्डका अनुसार सन् २०२६ को सेप्टेम्बरमा ८८ हजार २ सय ४८ पर्यटक नेपाल आएका छन्। यो संख्या सन् २०२५ को सोही महिनाको तुलनामा १२.१ प्रतिशत बढी हो।
क्षेत्रगत रूपमा हेर्दा दक्षिण एसियाली मुलुकबाट आउने पर्यटकको संख्या २३.९ प्रतिशतले बढेको छ। गत वर्ष सेप्टेम्बरमा यस क्षेत्रबाट २४ हजार २ सय ८५ पर्यटक नेपाल आएकोमा यस वर्ष ३० हजार ८५ पुगेको छ।
तथ्यांकले सार्कसहित अन्य एसियाली मुलुकबाट पर्यटक आगमन बढेको देखाएको छ। तर, अमेरिका र युरोपबाट आउने पर्यटकको संख्या भने घटेको छ।
एसियाका अन्य देशबाट आउने पर्यटकको संख्या ५८ प्रतिशतले बढेको छ। गत वर्ष १२ हजार ५ सय ९० पर्यटक आएकोमा यस वर्ष १९ हजार ८ सय ८८ जना आएका छन्। यद्यपि, आसियान क्षेत्रबाट हुने आगमन भने २५.९ प्रतिशतले घटेको छ। यस क्षेत्रबाट सेप्टेम्बरमा ५ हजार ४ सय २२ पर्यटक नेपाल आएका छन्।
युरोपबाट आउने पर्यटकको संख्या पनि ८.७ प्रतिशतले घटेको छ। गत वर्ष सेप्टेम्बरमा युरोपबाट १६ हजार ५ सय ९७ पर्यटक आएकोमा यस वर्ष १५ हजार १ सय ४८ जना आएका छन्।
अमेरिकी मुलुकबाट आउने पर्यटक आगमनमा पनि कमी आएको छ। यस वर्ष सेप्टेम्बरमा अमेरिकी देशबाट १० हजार १ सय ७ पर्यटक नेपाल आएका छन्। गत वर्ष सोही महिनामा यो संख्या ११ हजार ५ सय २३ थियो।
सार्क मुलुकमध्ये बंगलादेशबाट आउने पर्यटकको संख्या ३१.५ प्रतिशतले बढेर ३ हजार ९ सय ६४ पुगेको छ। गत वर्ष सेप्टेम्बरमा बंगलादेशबाट ३ हजार १५ पर्यटक आएका थिए।
भुटानबाट यस वर्ष १ हजार १ सय ११ पर्यटक नेपाल आएका छन्। गत वर्ष यो संख्या ८ सय ३३ थियो।
भारतबाट भने यस वर्ष १७ हजार ४ सय २५ पर्यटक नेपाल आएका छन्। गत वर्ष सेप्टेम्बरमा भारतबाट १५ हजार ५ सय ५६ पर्यटक आएका थिए।
श्रीलंकाबाट आउने पर्यटकको संख्या पनि उल्लेख्य बढेको छ। यस वर्ष श्रीलंकाबाट ७ हजार १ सय ८ पर्यटक नेपाल आएका छन्। गत वर्ष सोही महिनामा ४ हजार ६ सय १६ श्रीलंकाली पर्यटक आएका थिए।
बाढीले नेपाल र चीन दुवै देश प्रभावित भए पनि नेपालमा चिनियाँ पर्यटकको आगमन भने उल्लेख्य बढेको छ। तथ्यांकअनुसार गत वर्षको तुलनामा यस वर्ष सेप्टेम्बरमा चीनबाट आउने पर्यटकको संख्या दोब्बरभन्दा बढी भएको छ।
सन् २०२५ को सेप्टेम्बरमा चीनबाट ५ हजार २ सय ३७ पर्यटक नेपाल आएकोमा यस वर्ष ११ हजार २ सय १२ जना आएका छन्। यो अघिल्लो वर्षको तुलनामा ११४.१ प्रतिशत बढी हो।
त्यस्तै, जापानबाट आउने पर्यटकको संख्या पनि ४५.४ प्रतिशतले बढेको छ। सन् २०२५ मा जापानबाट १ हजार ४ सय २१ पर्यटक आएकोमा यस वर्ष २ हजार ६६ जना नेपाल आएका छन्।
युरोपेली मुलुकमध्ये बेलायतबाट आउने पर्यटकको संख्या भने २५.२ प्रतिशतले घटेको छ। गत वर्ष ४ हजार ९ सय ८१ बेलायती पर्यटक नेपाल आएकोमा यस वर्ष ३ हजार ७ सय २५ जना मात्र आएका छन्।
अमेरिकाबाट आउने पर्यटकको संख्या पनि घटेको छ। गत वर्ष ९ हजार ६ सय ७९ अमेरिकी पर्यटक नेपाल आएकोमा यस वर्ष ८ हजार २ सय ९९ जना आएका छन्।
यसैगरी, मध्यपूर्वी देशबाट आउने पर्यटकको संख्या यस वर्ष ११.९ प्रतिशतले बढेको छ।
