२४ चैत, काठमाडौं — डोनाल्ड ट्रम्पले इरानलाई कडा चेतावनी दिँदै छोटो समयमै ठूलो सैन्य कारबाही गर्न सकिने बताएका छन्।
उनले ‘Strait of Hormuz’ मंगलबारसम्म नखोले इरानका भौतिक पूर्वाधारमाथि आक्रमण गर्ने चेतावनी दिँदै आएका थिए। समयसीमा नजिकिँदै जाँदा उनले एकै रातमा देशलाई पूर्ण रूपमा ध्वस्त पार्न सकिने बताएका हुन्।
ह्वाइट हाउसमा पत्रकारहरूसँग कुरा गर्दै ट्रम्पले आवश्यक परे इरानका पुल, विद्युत् उत्पादन केन्द्रलगायत सबै संरचनामा केही घण्टामै आक्रमण गर्न सकिने दाबी गरे। उनले त्यस्तो अवस्था आएपछि युद्धपछि इरानको तेल स्रोतमा नियन्त्रण गर्ने संकेत पनि दिएका छन्।
यता, युद्ध रोक्न विभिन्न देश र मध्यस्थकर्ताहरूले प्रयास गरिरहेका छन्। पाकिस्तान, इजिप्ट र टर्कीले अन्तिम पहल गरिरहेका छन् भने ट्रम्पका विशेष दूत स्टिभ विटकफ र इरानका विदेश मन्त्री अब्बास अरागचीबीच पनि सन्देश आदानप्रदान भइरहेको जनाइएको छ।
रिपोर्टअनुसार, दुई चरणमा हुने सम्भावित सम्झौताबारे छलफल भइरहेको छ। पहिलो चरणमा ४५ दिनको युद्धविराम हुने र त्यस अवधिमा स्थायी समाधानका लागि वार्ता गरिने प्रस्ताव छ। आवश्यक परे युद्धविराम अवधि थप गर्न सकिने पनि बताइएको छ।
दोस्रो चरणमा भने हर्मुज मार्ग पूर्ण रूपमा सञ्चालन गर्ने र इरानको आणविक कार्यक्रमसम्बन्धी विषय अन्तिम शान्ति सम्झौतामार्फत टुंग्याउने योजना रहेको उल्लेख गरिएको छ।
