काठमाडौं, असार ७ — बाजुराको बुढीगंगा नगरपालिका–१० स्थित रिठा बजार नजिक आइतबार बिहान यात्रुवाहक बस दुर्घटना हुँदा २४ जना घाइते भएका छन्।
प्रहरीका अनुसार पवनदूत यातायातको सुपप्र ०२–००१ ख १३५५ नम्बरको बस अनियन्त्रित भई दुर्घटनामा परेको हो। प्रारम्भिक अनुसन्धानमा बसको ब्रेक फेल भएका कारण दुर्घटना भएको देखिएको प्रहरीले जनाएको छ।
प्रदेश ट्राफिक प्रहरी कार्यालय अत्तरियाका प्रमुख प्रहरी उपरीक्षक (एसपी) नवराज कार्कीका अनुसार दुर्घटनाका बेला बसमा ३५ जना सवार थिए। तीमध्ये २४ जना घाइते भएका छन्।
घाइतेमध्ये २३ जनाको जिल्ला अस्पताल बाजुरामा उपचार भइरहेको छ भने एक जनालाई थप उपचारका लागि अछामस्थित बयलपाटा अस्पताल पठाइएको प्रहरीले जनाएको छ।
दुर्घटनाको कारण र क्षतिको विस्तृत विवरण संकलन गर्ने काम जारी रहेको प्रहरीले जनाएको छ।
