१८ जेठ, काठमाडौं — प्रतिनिधि सभामा आर्थिक वर्ष २०८३/८४ को बजेटमाथिको छलफल आजदेखि सुरु हुने भएको छ।
अर्थमन्त्री डा. स्वर्णिम वाग्लेले गत जेठ १५ गते संघीय संसदमा २१ खर्ब २४ अर्ब ३४ करोड रुपैयाँको वार्षिक बजेट प्रस्तुत गरेका थिए।
आज दिउँसो १ बजे बस्ने प्रतिनिधि सभा बैठकमा अर्थमन्त्री वाग्लेले ‘आर्थिक वर्ष २०८३/८४ को राजश्व र व्ययको वार्षिक अनुमानमाथि सामान्य छलफल प्रारम्भ गरियोस्’ भन्ने प्रस्ताव पेश गर्ने कार्यसूची रहेको छ।
उक्त प्रस्ताव प्रस्तुत भएपछि सांसदहरूले बजेटका विभिन्न पक्षबारे आफ्नो धारणा राख्दै छलफलमा सहभागिता जनाउनेछन्।
संघीय संसदका महासचिव पद्मप्रसाद पाण्डेयका अनुसार आजको बैठकबाट बजेटमाथिको औपचारिक छलफल प्रक्रिया सुरु हुनेछ।
