काठमाडौं, असार ८ — विश्वकप फुटबलमा इजिप्टले आफ्नो इतिहासकै पहिलो जित दर्ता गरेको छ। सन् १९३४ मा पहिलो पटक विश्वकप खेलेको इजिप्टले ९२ वर्षपछि प्रतियोगितामा विजयको स्वाद चाख्दै न्युजिल्याण्डलाई ३–१ ले हराएको हो।
यस जितसँगै इजिप्ट समूह ‘जी’ को शीर्ष स्थानमा उक्लिएको छ भने नकआउट चरणमा पुग्ने सम्भावना पनि बलियो बनाएको छ।
खेलमा सुरुआती अग्रता भने न्युजिल्याण्डले लिएको थियो। १५औं मिनेटमा टिम पेनको कर्नरमा फिन सुरम्यानले हेडमार्फत गोल गर्दै टोलीलाई १–० को अग्रता दिलाएका थिए। तर दोस्रो हाफमा इजिप्टले उत्कृष्ट पुनरागमन गर्दै लगातार तीन गोल गर्यो।
प्रशिक्षक होसाम हसानले रणनीतिमा परिवर्तन गरेपछि इजिप्टको खेलमा सुधार देखिएको थियो। ५८औं मिनेटमा मोहम्मद हानीको क्रसलाई मोस्टाफा जिकोले हेडमार्फत जाली चुमाउँदै खेल बराबरीमा ल्याए।
त्यसपछि इजिप्टका कप्तान मोहम्मद सलाहले जिकोसँगको आकर्षक पास संयोजनपछि गोल गर्दै टोलीलाई पहिलो पटक अग्रता दिलाए। खेलको ८२औं मिनेटमा सलाहकै कर्नरमा वैकल्पिक खेलाडी ट्रेजेगुएले हेडमार्फत गोल गर्दै इजिप्टको ३–१ को जित सुनिश्चित गरे।
सलाहले खेलमा एक गोल गर्नुका साथै अर्को गोलको अवसर सिर्जना गर्दै उत्कृष्ट प्रदर्शन गरे। जिकोले पनि एक गोल र एक असिस्ट गर्दै टोलीको जितमा महत्वपूर्ण योगदान दिए।
हार बेहोरे पनि न्युजिल्याण्डको नकआउट चरण पुग्ने सम्भावना भने कायम छ। अब उसले अर्को खेलमा बेल्जियमविरुद्ध जित निकाल्नुपर्ने दबाबमा रहनेछ।
यता, आफ्नो चौथो विश्वकप सहभागितामा पहिलो जित दर्ता गरेको इजिप्टले आगामी शनिबार इरानसँग प्रतिस्पर्धा गर्नेछ। उक्त खेलमा विजयी भए इजिप्ट समूह विजेताका रूपमा नकआउट चरणमा प्रवेश गर्नेछ।
