१ पुष, काठमाडौं — मंगलबार सेयर बजारमा उल्लेख्य सुधार देखिएको छ। नेप्से परिसूचक १८.३७ अंकले उकालो लाग्दै २६१९ विन्दुमा पुगेको छ, जुन सो दिनको उच्चतम स्तर पनि हो। कारोबार सुरु भएदेखि बन्द हुँदासम्म बजार कहिल्यै ओरालो लागेन।
कुल १८७ कम्पनीको सेयर मूल्य बढ्दा ६१ कम्पनीको घट्यो भने ११ कम्पनीको मूल्य स्थिर रह्यो। कारोबार रकम भने अघिल्लो दिनको ३ अर्ब ४४ करोडबाट घटेर ३ अर्ब २९ करोड रुपैयाँमा सीमित भयो।
व्यापार समूह बाहेक सबै सूचकहरू बढेका छन्। व्यापार समूह ०.०१ प्रतिशतले घट्दा बैंकिङ ०.३५, विकास बैंक १.५६, फाइनान्स ०.४१, होटल तथा पर्यटन १.४९, जलविद्युत् ०.७७, लगानी ०.६८, जीवन बीमा ०.६९, उत्पादन तथा प्रशोधन ०.४६, माइक्रोफाइनान्स ०.८६, निर्जीवन बीमा ०.८९ तथा अन्य समूह १.१५ प्रतिशतले बढे।
तीन कम्पनीको सेयर मूल्य १० प्रतिशतले वृद्धि भएको छ। ती कम्पनीमा स्वस्तिक लघुवित्त, एसवाई प्यानल र नारायणी डेभलपमेन्ट बैंक रहेका छन्। यसैगरी बाराही हाइड्रोपावरको सेयर मूल्य ७.०४ प्रतिशत र लुम्बिनी विकास बैंकको ५.८१ प्रतिशतले उक्लिएको छ।
यता स्वेतगंगा हाइड्रोपावरको सेयर मूल्य सबैभन्दा धेरै ४.१६ प्रतिशतले घट्यो। कारोबार रकमका आधारमा आज ङादी ग्रुप, लुम्बिनी विकास बैंक, हिमालयन रिइन्स्योरेन्स, सीईडीबी होल्डिङ्स र राधि विद्युत् शीर्ष पाँचमा रहे।
