२८ वैशाख, काठमाडौं — काठमाडौंमा अवतरण गर्ने क्रममा टर्किस एयरलाइन्सको विमानमा आगलागी भएको छ । आगो अहिले दमकलको सहयोगमा नियन्त्रणमा ल्याइएको छ ।
नेपाल नागरिक उड्डयन प्राधिकरण (क्यान)का सूचना अधिकारी ज्ञानेन्द्र भुलका अनुसार विमानमा रहेका सबै यात्रु सुरक्षित छन् । यात्रुहरुलाई आपत्कालीन ढोका खोलेर बाहिर निकालिएको थियो । विमानमा चार बालबालिकासहित २७७ जना यात्रु सवार रहेका थिए ।
आगो लागेपछि उद्धारका क्रममा केही यात्रु सामान्य घाइते भएका छन् । विमानमा केही शव र यात्रुका सामान पनि रहेको बताइएको छ ।
इस्तानबुलबाट काठमाडौं आएको टर्किस एयरलाइन्सको TK726 विमान आज बिहान करिब पौने सात बजे अवतरण गर्ने क्रममा चक्कामा आगो लागेको थियो ।
घटनापछि विमान धावनमार्गमै रोकिएकाले अन्तर्राष्ट्रिय उडान प्रभावित भएका छन् । विशेषगरी ठूला अन्तर्राष्ट्रिय जहाजहरुको नियमित उडान तालिकामा असर परेको जनाइएको छ ।
