२८ वैशाख, काठमाडौं — पूर्वराष्ट्रपति विद्यादेवी भण्डारीले नेकपा एमालेका अध्यक्ष केपी शर्मा ओलीसँग लामो राजनीतिक छलफल गरेकी छन् ।
स्रोतका अनुसार भण्डारी आइतबार दिउँसो १ बजे गुन्डु पुगेर ओलीसँग दुई घण्टाभन्दा बढी समय सम्वादमा बसेकी थिइन् । स्वास्थ्य अवस्था बुझ्न पुगेकी उनले एमालेको आन्तरिक राजनीतिबारे पनि सुझाव दिएको बताइएको छ ।
भण्डारी निकट स्रोतका अनुसार उनले पार्टीभित्र पदाधिकारीदेखि कार्यकर्तासम्मले निर्वाचन समीक्षा बैठकको माग गरिरहेको भए पनि हालसम्म बैठक नबोलाइएको विषय उठाएकी थिइन् । उनले समीक्षा बैठक गर्न ढिलाइ नगर्न ओलीलाई सुझाव दिएकी बताइएको छ ।
‘कार्यकर्तामा निराशा बढ्दै गएको छ, धेरै समय अन्योलमा राख्नु हुँदैन,’ भन्दै भण्डारीले बैठक चाँडै बोलाउन आग्रह गरेको स्रोतको भनाइ छ ।
एमालेभित्र ओलीले नेतृत्व छोड्नुपर्ने आवाज उठिरहेको प्रसंग पनि उनले उल्लेख गरेकी थिइन् । तर उनले तत्काल नेतृत्व परिवर्तनभन्दा पहिले पार्टी बैठक राखेर छलफल अघि बढाउन सुझाव दिएको बताइएको छ ।
ओलीले भने परिस्थिति नमिलेकाले बैठक बस्न ढिलाइ भएको जवाफ दिएका थिए । उनले अन्य नेतासँग पनि यस्तै धारणा राख्दै आएको बताइएको छ ।
प्रतिनिधिसभा निर्वाचनमा एमालेले अपेक्षाकृत कमजोर नतिजा बेहोरेपछि ओलीमाथि नेतृत्व छोड्न दबाब बढ्दै गएको छ । यसबीच पूर्वराष्ट्रपति भण्डारीले लगातार ओलीसँग भेट गर्दै पार्टीको आन्तरिक अवस्थाबारे चासो व्यक्त गरिरहेकी छन् ।
२१ फागुनमा भएको निर्वाचनपछि भण्डारीले ओलीलाई भेटेको यो चौथो पटक हो ।
