१४ पुस, काठमाडौं — तत्कालीन गृहमन्त्री रमेश लेखकले भदौ २३ गते भएको घटनाको नैतिक जिम्मेवारी आफूले लिएको तर भदौ २४ गते भएका घटनाहरू भने योजनाबद्ध भएको दाबी गरेका छन्।
सोमबार भदौ २३ र २४ गतेका घटनासम्बन्धी जाँचबुझ आयोगमा बयान दिँदै लेखकले २३ गतेको दुःखद् घटनापछि नैतिक जिम्मेवारी वहन गर्दै राजीनामा दिएको बताएका हुन्।
बयानमा उनले भनेका छन्, “गृह मन्त्रालयको राजनीतिक नेतृत्वमा रहेको हैसियतले त्यस घटनाबाट म अत्यन्तै मर्माहित भएँ। गहिरो पीडाबोधका कारण गृहमन्त्री पदमा रहेका व्यक्तिले पदीय नैतिक जिम्मेवारी लिनुपर्छ भन्ने अठोटका साथ नैतिकताका आधारमा तत्काल राजीनामा दिएको हुँ। अहिले पनि म भन्छु— भदौ २३ को घटना हुँदा म देशको गृहमन्त्री थिएँ। गृहमन्त्रीको रूपमा काम गर्दा सधैँ नेपालको संविधान, प्रचलित कानून, सरकारी नीति र गृह मन्त्रालयको जिम्मेवारीभित्र रहेर असल मनसायका साथ काम गरेको छु र व्यक्तिगत तथा पदीय नैतिक जिम्मेवारीलाई कहिल्यै बिर्सिएको छैन।”
तर उनले आफ्नो राजीनामापछि भदौ २४ गते घटेका हिंसात्मक घटनाहरूलाई राष्ट्रको अस्तित्व, स्वाभिमान र लोकतन्त्रविरुद्धको नियोजित आक्रमणको रूपमा व्याख्या गरेका छन्।
“सिंहदरबार, सर्वोच्च अदालत, संसद् भवन, राष्ट्रपति भवनजस्ता राज्यका प्रमुख निकाय र कार्यपालिका, न्यायपालिका तथा व्यवस्थापिकामाथि आक्रमण गरी जलाउने दुस्साहस कुनै पनि देशभक्त नेपालीले कल्पना गर्न सक्दैन,” उनले बयानमा उल्लेख गरेका छन्।
लेखकका अनुसार, लोकतन्त्रमा शक्ति सन्तुलन र पृथकीकरणको सिद्धान्त प्रतिनिधित्व गर्ने संस्थामाथि भएको आक्रमण जेन–जी पुस्ताको सोच र योजनाभन्दा बाहिरको विषय हो। उनले निष्कर्ष निकाल्दै भनेका छन्, “यो घटना नियोजित षड्यन्त्र थियो। यो राष्ट्र र लोकतन्त्रविरुद्ध गरिएको सुनियोजित आक्रमण हो भन्ने मेरो ठम्याइ छ।”
