१७ पुस, काठमाडौं — राष्ट्रिय स्वतन्त्र पार्टी (रास्वपा)सँग एकता गरेका काठमाडौं महानगरपालिकाका मेयर बालेन्द्र शाह र ऊर्जामन्त्री कुलमान घिसिङ पक्षबाट पार्टी पदाधिकारीमा कति जनालाई समेट्ने भन्ने विषयमा सहमति जुटेको छ।
रास्वपा स्रोतका अनुसार बालेन पक्षबाट एक जना महामन्त्री र एक जना सहमहामन्त्री नियुक्त गर्ने समझदारी भएको छ। त्यस्तै, कुलमान घिसिङ समूहलाई एक जना सहमहामन्त्री र एक जना सहप्रवक्ताको जिम्मेवारी दिने सहमति भएको छ।
‘बालेन र कुलमान दुवै समूहबाट दुई–दुई जनालाई पदाधिकारीमा समावेश गर्ने भद्र सहमति बनेको हो,’ रास्वपा स्रोतले भन्यो, ‘सहमति अनुसार दुवै पक्षबाट नाम आउन बाँकी छ।’
पार्टी सभापति रवि लामिछानेले बालेन शाह र कुलमान घिसिङलाई रास्वपामा समेट्न छुट्टाछुट्टै सहमतिपत्रमा हस्ताक्षर गरेका थिए।
सहमति अनुसार बालेन शाहलाई आगामी प्रतिनिधिसभा निर्वाचनमा प्रधानमन्त्रीको उम्मेदवार बनाउने व्यवस्था गरिएको छ। उज्यालो नेपाल पार्टीका संरक्षकसमेत रहेका ऊर्जामन्त्री कुलमान घिसिङलाई भने रवि लामिछानेपछि पहिलो वरीयताको उपसभापति बनाइएको छ।
वरीयताका हिसाबले कुलमानपछि उपसभापतिमा डीपी अर्याल र स्वर्णिम वाग्ले रहने छन्। हाल रास्वपामा कबिन्द्र बुर्लाकोटी महामन्त्री छन् भने सहमहामन्त्रीमा विपिन आचार्य मात्रै छन्। सहप्रवक्ताको जिम्मेवारी भने प्रतिभा रावल र रमेश प्रसाईंले सम्हालिरहेका छन्।
