१६ वैशाख, काठमाडौं — राष्ट्रिय स्वतन्त्र पार्टी (रास्वपा) का सभापति रवि लामिछानेसहितका प्रतिवादीमाथि लागेको सम्पत्ति शुद्धीकरण र संगठित अपराधसम्बन्धी मुद्दा संशोधन गर्ने महान्यायाधिवक्ताको निर्णयविरुद्ध परेको रिटमाथि अब सुनुवाइ हुने भएको छ।
यो रिटमाथि बिहीबार न्यायाधीशहरू अब्दुल अजीज मुसलमान, श्रीकान्त पौडेल र शान्तिसिंह थापाको पूर्ण इजलासमा सुनुवाइ हुने तय गरिएको छ।
यसअघि वैशाख १० गतेका लागि सुनुवाइको मिति तोकिएको थियो। तर महान्यायाधिवक्ताको पक्षबाट स्थगन गरिएपछि त्यो दिन सुनुवाइ हुन सकेन।
चैत १५ गते न्यायाधीश विनोद शर्मा र अब्दुल अजीज मुसलमानको इजलासले उक्त मुद्दा थप स्पष्ट व्याख्या आवश्यक रहेको भन्दै पूर्ण इजलासमा पठाउने आदेश दिएको थियो। उक्त इजलासले आठ वटा मुख्य प्रश्नमा स्पष्टता आवश्यक रहेको उल्लेख गरेको थियो।
पूर्ण इजलास भनेको तीन वा तीनभन्दा बढी न्यायाधीश सहभागी हुने इजलास हो, जसले जटिल मुद्दामा अन्तिम निर्णय गर्ने गर्छ।
यसअघि पुस ३० गते तत्कालीन महान्यायाधिवक्ता सबिता भण्डारीले रवि लामिछानेसहितका प्रतिवादीविरुद्धको सम्पत्ति शुद्धीकरण र संगठित अपराधसम्बन्धी मुद्दा संशोधन गर्ने निर्णय गरेकी थिइन्। तर त्यसको केही दिनपछि, माघ २ गते, उक्त निर्णयमा त्रुटि भएको भन्दै सबै प्रतिवादीका हकमा आरोप संशोधन गर्न अनुमति दिइएको थियो।
यस निर्णयमा फरार रहेका जिबी राई लगायत अन्य प्रतिवादीहरू पनि समावेश थिए। महान्यायाधिवक्ताको यो निर्णयविरुद्ध सर्वोच्च अदालतमा तीन वटा रिट दायर भएका थिए।
