२५ मंसिर, काठमाडौं — भिजिट भिसा तस्करीमार्फत यात्रुबाट अवैध रूपमा रकम असुलेको आरोपमा नेपाल सरकारका सहसचिव तीर्थराज भट्टराई र शाखा अधिकृत यज्ञ अर्यालसहित ६ जनाविरुद्ध अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ। आयोगले उनीहरूलाई प्रतिवादी बनाउँदै बिहीबार विशेष अदालतमा मुद्दा दर्ता गरेको हो।
यस प्रकरणमा सहसचिव भट्टराईलाई ७ जेठ २०८२ मा त्रिभुवन अन्तर्राष्ट्रिय विमानस्थलबाटै पक्राउ गरिएको थियो। उनी पक्राउ पर्दा विमानस्थल अध्यागमन प्रमुखका रूपमा कार्यरत थिए। भिजिट भिसामा विदेश जाने नेपाली यात्रुबाट रकम असुलेको दाबीमा आयोगले लामो समयदेखि अनुसन्धान गरिरहेको थियो।
आयोगले सहसचिव भट्टराईविरुद्ध करिब ७९ लाख रुपैयाँ बिगो दाबी गरेको छ भने शाखा अधिकृत अर्यालविरुद्ध ५ लाख बिगो तोकिएको छ। मुद्दामा समावेश अन्य चार जना बिचौलिया र भिसा प्रक्रियामा संलग्न व्यक्तिहरू रहेको अख्तियार स्रोतले जनाएको छ।
यो प्रकरण नयाँ होइन। भिजिट भिसामा विदेश जाने सर्वसाधारणबाट अध्यागमन अधिकृतहरूले रकम असुल्ने चलन वर्षौँदेखि जारी रहेको प्रहरी अनुसन्धानले देखाएको थियो। सोही आधारमा जिल्ला सरकारी वकिल कार्यालय काठमाडौँले १० माघ २०८० मा विमानस्थल अध्यागमनका ९ अधिकृतसहित २२ जनाविरुद्ध संगठित अपराध र किर्ते मुद्दा दायर गरेको थियो। तर करीब एक वर्षपछि १४ मंसिर २०८१ मा काठमाडौँ जिल्ला अदालतले बिचौलिया र ट्राभल एजेन्सी सञ्चालकलाई मात्र दोषी ठहर गरेको थियो।
नयाँ मुद्दा दायरसँगै भिजिट भिसा तस्करी प्रकरण फेरि एकपटक न्यायिक प्रक्रियाको केन्द्रमा आएको छ।
