२१ वैशाख, काठमाडौं — राष्ट्रिय स्वतन्त्र पार्टी (रास्वपा) ले आगामी स्थानीय तह निर्वाचनमा उम्मेदवार बन्न चाहने व्यक्तिले क्यान्डिडेट क्लब र लिडरसिप एकेडेमी अनिवार्य रूपमा पूरा गरेको हुनुपर्ने व्यवस्था ल्याउने तयारी गरेको छ। यसका लागि पार्टीले उम्मेदवार छनोटसम्बन्धी मस्यौदा तयार गरेको छ, जसलाई सहमहामन्त्री विपिनकुमार आचार्य नेतृत्वको कार्यदलले तयार पारेको हो। मस्यौदामा क्यान्डिडेट क्लबमा सहभागी हुन आवश्यक मापदण्ड र योग्यता स्पष्ट रूपमा उल्लेख गरिएको छ। क्यान्डिडेट क्लबमा सहभागी हुन कम्तीमा २१ वर्ष उमेर पुगेको र सम्बन्धित स्थानीय तहको मतदाता सूचीमा नाम भएको हुनुपर्नेछ। साथै पार्टीले आफ्नो विधानअनुसार थप योग्यता पनि निर्धारण गरेको छ। उम्मेदवार बन्न चाहने व्यक्तिमा सुशासन, पारदर्शिता र नागरिकप्रति…

२१ वैशाख, काठमाडौं — सरकारले संवैधानिक परिषद्सम्बन्धी अध्यादेश फेरि राष्ट्रपतिसमक्ष सिफारिस गरेको छ। सोमबार बसेको मन्त्रिपरिषद् बैठकले ‘संवैधानिक परिषद् (पहिलो संशोधन) अध्यादेश २०८३’ पुनः जारी गर्न सिफारिस गर्ने निर्णय गरेको सरकारका प्रवक्ता सस्मित पोखरेलले जानकारी दिएका छन्। यसअघि पनि यहीसहित ८ वटा अध्यादेश सिफारिस गरिएको थियो। तीमध्ये ७ वटा अध्यादेश राष्ट्रपतिबाट जारी भइसकेका छन् भने संवैधानिक परिषद्सम्बन्धी अध्यादेश पुनर्विचारका लागि फिर्ता पठाइएको थियो। सरकारले उक्त अध्यादेशमा कुनै परिवर्तन नगरी जस्ताको तस्तै पुनः सिफारिस गरेको जनाएको छ।

२१ वैशाख, काठमाडौं — सङ्घीय संसद् प्रतिनिधिसभाका सभामुख डोलप्रसाद अर्याल (डीपी) ले प्रतिनिधिसभामा रहेका विभिन्न दलका प्रमुख सचेतक र सचेतकहरूको बैठक बोलाएका छन्। सभामुखका प्रमुख स्वकीय सचिव मुना कुँवरका अनुसार उक्त बैठक सोमबार दिउँसो १२ बजे सिंहदरबारमा बस्ने तय गरिएको छ। सत्ता पक्ष र विपक्षी दलका प्रमुख सचेतकहरूसँग समसामयिक विषयमा छलफल गर्न सभामुखले बैठक आयोजना गरेका हुन्। प्रतिनिधिसभामा हाल राष्ट्रिय स्वतन्त्र पार्टी, नेपाली कांग्रेस, नेकपा एमाले, नेकपा, श्रम संस्कृति पार्टी र राष्ट्रिय प्रजातन्त्र पार्टीका सांसदहरूको प्रतिनिधित्व रहेको छ।